Wengi wetu tunatamani kuwa na maisha yaliyobadilika.  Kwa nini?  Ni kwa sababu hakuna aliyekamilika.Tunafahamu kwamba tunayo mapungufu na madhaifu.  Tungependa kuyashinda, ndiyo maana tunataka kuwa na maisha yaliyobadilika.

Mtu hawezi kuishi maisha bora kama bado ana uchungu moyoni kutokana na tukio lililotokea zamani; au kama anamwonea mwingine wivu; au kama hajasamehe mtu kutoka moyoni … au lo lote lile lingine, ni mengi.

Tunafahamu hayo lakini bado tunajikuta tumekwamia pale pale – tukishindwa kuachana nayo.  Sijui kama umeshaona hayo?

Mungu anatupenda sana, kama vile mzazi mwema apendavyo mwanae. hekima yake anayoitumia kwa kutusaidia kushinda mapungufu yetu ni sahihi kabisa, lakini watu wa tabaka zote bado wanalaumu dhana ya kumtii Mungu.

1 Yohana 2:3-6  Na katika hili twajua ya kuwa tumemjua yeye, ikiwa tunashika amri zake.  Yeye asemaye, Nimemjua, wala hazishiki amri zake, ni mwongo, wala kweli haimo ndani yake.  Lakini yeye alishikaye neno lake, katika huo upendo wa Mungu umekamilika kweli kweli.  Katika hili twajua ya kuwa tumo ndani yake.  Yeye asemaye ya kuwa anakaa ndani yake, imempasa kuenenda mwenyewe vile vile kama yeye alivyoenenda.

Wakati ninafundisha habari ya kutii, watu wanasema mimi ni mtu wa sheria, Mfarisayo na kadhalika.  Sawa, haina shida, ukinishutumu ujue kwamba mimi ni mwenye kupeleka ujumbe tu.

Yeye asemaye, Nimemjua, wala hazishiki amri zake, ni mwongo, wala kweli haimo ndani yake.  Lakini yeye alishikaye neno lake, katika huyo upendo wa Mungu umekamilika kweli kweli.    

Hili ndilo Neno la Mungu safi na lenye afya kwa ajili yako leo.