Stel jou ‘n wêreld sonder die son, en natuurlik ook sonder die maan, voor. ‘n Konstante toestand van duisternis, een wat nooit sal eindig nie. In sulke duisternis sal lewe op hierdie aarde redelik vinnig tot niet gaan.

Nouja, dis ‘n vrolike noot om vandag ons tyd saam af te skop! Toemaar, moenie bekommerd wees nie, dit gaan beter word. Baie beter. Stel jou nou ‘n wêreld voor waar die son en die maan oorbodig geword het; een waar hulle nie meer nodig is nie.

Johannes, die Apostel van Jesus, het ‘n kykie in die hemel gegee; ‘n kykie in die ewigheid wat wag vir die mense wat in Jesus glo. Hier is net ‘n klein stukkie van wat God deur hom geopenbaar het:

Openbaring 21:22-24 Ek het nie ’n tempel in die stad gesien nie, want die Here God, die Almagtige, en die Lam is sy tempel. Die stad het ook nie die son en die maan nodig om dit te verlig nie, want die heerlikheid van God het dit verlig, en die Lam is sy kandelaar. Die nasies sal in die stad se lig lewe en die konings van die aarde bring hulle glorie daarheen.

Ag nou ja my vriend, ek en jy gaan verseker nog ‘n paar donker, sonlose, maanlose dae op hierdie aarde hê. Dit tref ons almal van tyd tot tyd. Ons het gister gesien dat Jesus na hierdie aarde gekom het om sy heerlikheid, sy Lig in ons lewens te skyn. Dis asemrowend!

Maar dit is net die begin, want wanneer jy sy heerlike uitnodiging aanvaar, wanneer jy jou vertroue in Jesus plaas, gaan jy ‘n toekoms binne, waar Hy jou Lig sal wees … vir altyd. Dit is wat Hy vir jou gereed gemaak het; dis wat vir jou voorlê.

Want dit is sy Woord. Vars … vir jou … vandag.