Ek dink nie daar is een persoon op hierdie aarde wat nie al spyt was oor iets wat hy of sy gesê het nie. Ai, as ons dit maar net kon terugtrek. As ons net daardie dom ding wat by ons monde uitgekom het, kon uitvee. Maar dit werk nie so nie.

Wat ons sê en hoe ons dit sê, is ‘n venster in ons siel. Ek en jy, kan ‘n wonderlike beeld voorhou. Ons kan respekvol en nederig én godvresend optree, maar eendag glip iets aakligs uit, wat die hele wêreld wys wat regtig binne aangaan.

Ek bedoel, jy is lief vir God, nie waar nie? Jy wil Hom eer, maar soms bring ons tong ons in groot verleentheid.

Jakobus 3:9-12 Met die tong loof ons die Here en Vader, en met die tong vloek ons die mense wat as die beeld van God gemaak is. Uit dieselfde mond kom lof en vloek. My broers, so moet dit nie wees nie. ‘n Fontein laat tog nie uit dieselfde oog vars en brak water opborrel nie. ‘n Vyeboom, my broers, kan tog nie olywe dra nie, of ‘n druiwestok vye nie. ‘n Brak fontein kan mos nie vars water gee nie!

Daar is nie ‘n enkele persoon wat jy ooit sal ontmoet, wat nie na God se beeld geskape is nie. Daar is ook niemand vir wie God nie net so lief het, soos Hy vir jou het nie. En om God die een oomblik te loof, en dan in die volgende oomblik iemand vir wie Hy lief is, te vervloek, is absolute skynheiligheid.

Wie is die mense in jou lewe, van wie jy regtig nie hou nie? Miskien is dit tyd om te begin bid dat God jou hart teenoor hulle sal verander. Miskien is dit tyd om te begin fokus op jou houding teenoor hulle. Hoekom? Omdat God hulle liefhet.

Dink daarom tog baie mooi wat jy sê. . .

Dit is God se Woord. Vars … vir jou … vandag.