Ek weet nie waar jy staan in terme van jou verhouding met Jesus nie, maar ‘n integrale element van daardie verhouding is om deel te wees van sy liggaam; deel van die familie van gelowiges.

Een van die vrae wat ek gereeld gevra word, is, hoe kies ek die regte kerk om by in te skakel? En omdat dit so ‘n belangrike vraag is, is dit iets waaroor ek nogal baie praat.

Dit is maklik om, wanneer jy ‘n kerk soek om deel van te word, jy op die sigbare dinge fokus. Die demografie van die gemeente, die styl van aanbiddingsmusiek, die kinderprogram, die gemak om soontoe te gaan, die beskikbaarheid van parkeerplek, selfs hoe sag die sitplekke is.

Maar in ‘n era waar ons minder en minder bekommerd is oor die waarheid en meer gefokus is op ons gemak en gerief, loop ons die risiko om die belangrikste ding te mis.

Titus 1:9 Hy moet vashou aan die betroubare woord waarin hy onderrig is. Dan sal hy in staat wees om ander met die gesonde leer aan te moedig en die argumente van teenstanders te weerlê.

Die oorspronklike Griekse teks van daardie gedeelte praat van “gesonde leer”! Wie stel belang in die leerstelling? Dis outyds. Nee wag, die leerstelling vertel ons of die kerk God se waarheid verkondig. Daar is nie een van ons wat nie nodig het om God se waarheid, God se liefde en God se krag in ons harte te beleef nie. Want daar is nie een van ons wat nie die een of ander sonde in ons lewens het om te hanteer nie.

Soos iemand eenkeer gesê het, moenie die kerk naaste aan jou huis soek nie. Soek die kerk naaste aan die Bybel. Dit is waar jy genesing vir jou siel sal vind.

En dit is God se Woord. Vars … vir jou … vandag.