Vergifnis is nie iets waaroor daar deesdae baie gepraat word nie. En tog sal die seer van die verlede nooit weggaan, totdat ons diegene wat ons seergemaak het, vergewe het nie.

Dit is verbasend hoeveel mense in ‘n nimmereindigende siklus van onvergewensgesindheid vasgeketting is aan die seer van die verlede. Maar weet jy, dit is ‘n ernstige saak vir Jesus. Hy het ‘n paar baie onpopulêre dinge gesê oor ons versuim om te vergewe:

In Mattheus 6:14,15 staan: “As julle ander mense hulle oortredings vergewe, sal julle hemelse Vader julle ook vergewe. Maar as julle ander mense nie vergewe nie, sal julle Vader julle ook nie julle oortredings vergewe nie.

Onthou, dit is Jesus se woorde, nie myne nie. En Hy stel dit baie duidelik sodat ons almal dit kan verstaan.

Ons leef onder hierdie valse verwagting dat dinge reggestel moet word, dat geregtigheid moet geskied, voordat ons kan laat gaan en vergewe. Maar so dikwels sal geregtigheid nie geskied nie. Só dikwels is die een wat jou te nagekom het, onbewus daarvan.

Nee, ons weet mos, alle probleme word nie maklik opgelos en met ‘n mooi, netjiese lintjie vasgemaak nie. Hoe vergewe ons dan? Jesus leer ons om ons reg op vergelding prys te gee, soos wat Hy vir ons op daardie wrede Kruis gedoen het.

Dink mooi daaraan. Hy het sy lewe gegee, sodat ek en jy vergewe kan word. Dink jy dit het vir Hom regverdig gelyk, toe Hy vir daardie verskriklike ure met sy volle gewig aan daardie wrede spykers deur sy hande en voete gehang het?

En tog, deur sy wonde, is ons genees.

En as ons besluit om, ten spyte van ons pyn, te vergewe – ja, vergifnis het altyd ‘n prys – dan genees Hy die seer van die verlede.

Dit is God se Woord. Vars … vir jou … vandag.