Kwesinye isikhathi senza izinto ezingubuwula ngomzuzwana omncane nje .Kade izinto zihamba zihleleke kahle ,dukuduku sokanakele njalo ! Kube khona into esikhipha egiyeni ,yithi labaya sesigijimela ekwenzeni okubi .

Kubalekisa amandla enkolelo kwesinye isikhathi ,ukuthi kade yonke  into ihamba kahle ebese nje qhuuh ngento eyodwa nansi inqola isiyoshona esihosheni amasolokohlo . Kube khona into esicunulile .Kube khona into eyodwa nje evese yathela usawoti esilondeni sethu ,mhlampe ebesesiqala ukuphola ,emva kwalokho kube wuza-luzile umshawushile ongalawuleki wokufutheka .

Izaga  14:17 Isififane siyenza ubuwula ,kepha umuntu wamasu unokuthula .

Manje ,kulesisaga iNkosi uSolomoni ikhuluma ngohlobo olubili lobubi . Uhlobo lobubi olwenzeka ngokuphazima kweso ,ebese akhulume ngohlobo olulokhu lubila kithi ngaphakathi ngesikhathi sisazipha isikhathi sihlela indlela esizoziphindiselela ngayo. Sizobuye sikhulume ngaleyo yesibili ,okwamanje ake sikhulume ngale yokuqala .

Isififane[onenhliziyo echukuluzeka masisha] siyenza ubuwula .Ngimelwe ukwethembeka la .Nami nginenhliziyo esheshayo ukuchukuluzeka .Ngenza yonke into ngokushesha .Ngihamba ngisheshe .Ngicabanga ngokushesha. Ngidinwa ngokushesha .Ngiyashesha ukuphendula . Ngingulowomuntu ngokwemvelo yami .Mhlampe wena awunjalo .Mhlawumbe uyaphuza ukucabanga uphendule kanjani esimweni esikuchukuluzayo ,kodwa okusalayo nakuwe lenhlese yokucinana isuke ikhona .

Yiziphi izinto ezivese zikugovuze ?Izinto ezikwenza uzizwe usuhanjwa makhizane ke manje umzimba wonke ?  Futhi kukusebenzele kahle kanjani lokho phambilini ? Buhle buni obukulethile kwezobudlelwane nabanye abantu kunye nesithunzi sakho ?

Ukucinana ngokushesha kusenza senze izinto eziphumile esandleni .

Zibone lezizinto ezikuchukuluzayo .Qala manje impilo uyihlele ngokuhlukile .Ume ukuchukuluzwa yizo .

Yilo kanye iZwi likaNkulunkulu leli … Eliza kuwe li-Fresh namhlanje..