Uma sithwele kanzima ezikhathini ezinzima ,uma siphila ukuphila kwemiphumela yesakwenza ,okwezono zethu ,kulula ukucabanga uzitshele ukuthi uNkulunkulu uhleli ntofontofo ezulwini ,ejabulela ukusibona sidonsa kanzima seziyimi emthumeni la kithi .Kodwa cha akulona iqiniso lelo .

Umqondo wokugigitheka maselukhwibikile ugibe sithi ngci ngci awuzwake zibanjwe kweziwudlayo ,angithi ngokwethu siye sithi noNkulunkulu usho njalo ezulwini mayesibuka sesipaquza ? Kodwa cha akuwona sanhlobo umqondo osengqonweni kaNkulunkulu lowo lutho sanhlobo . 

Ngoba nakuba sibonile izolo ukuthi uyavakashela imiphumela yezono zethu phezu kokuphila kwethu ,inhliziyo yakhe ngathi zikhathi zonke,yebo zikhathi zonke ngukusihlenga .Usifuna sibuyele ezandleni zakhe sifudumele kuYe .Ufuna ukusibusa ngothando lwakhe ,ndlelanye njengokokuba ubaba omuhle engenza enganeni yakhe .

Yilelophuzu kanye alenza kubantu bakhe ngomphrofethi wakhe uJoweli :

Joweli  2:25-27 Ngiyakubuyisela kini iminyaka eyadliwa yisikhonyane ,nezinkumbi nenkasa nesibotho ,impi yami enkulu engayithuma phakathi kwenu.

Niyakudla nokudla nisuthe ,nilidumise igama likaJehova uNkulunkulu wenu oniphathe ngokumangalisayo;abantu bami abayikujabha kuze kube phakade . Niyakwazi ukuthi ngiphakathi kuka Israel nokuthi nginguJehova uNkulunkulu wenu ,akakho omunye ,abantu bami abayikujabha kuze kube phakade .

Sihlobo sami ,ngicela ungilalele .Uma kungukuthi ngenxa yezono zakho uqhelile kuNkulunkulu waba sehlane   elibi empilweni ;angikutshele ukuthi namhlanje uNkulunkulu ukhuluma nawe egcwele uthando lwakhe lokukuhlenga . Namhlanje uNkulunkulu ukubizela ubuyele kuYe akuphathe ngemfudumalo . 

Yilo kanye iZwi likaNkulunkulu leli … Eliza kuwe li-Fresh namhlanje.