Die vraag is: Het Jesus regtig uit die dood opgestaan, of was dit ‘n komplot, ‘n bedrogspul wat deur sy ontnugterde dissipels opgemaak is? Wat sê die getuienis? Kom ons kyk.

Verleidelike, glansryke advertensies belowe ons ‘n nuwe lewe. Gaan op hiérdie vakansie en jy voel soos ‘n nuwe mens. Koop hierdie bevogtiger en jy sal ‘n nuwe mens wees. Jy ken die verkoopstegnieke. Maar dit maak nie saak hoeveel ons spandeer nie; ons gaan nooit op húlle manier ‘n nuwe persoon word nie. Dit is alles ‘n bedrogspul.

‘n Paar duisend jaar gelede, in Israel, is ‘n timmerman uit Nêrens aan ‘n kruis vasgespyker. ‘n Paar dae later is die klip voor sy graf weggerol en honderde mense het getuig dat hulle Hom weer lewendig gesien het.

Een moontlikheid is dat dit alles ‘n bedrogspul was. Miskien het sy dissipels die liggaam gesteel? Maar in die volgende paar dekades is elkeen van hierdie dissipels geslaan en doodgemaak omdat hulle verklaar het dat Christus uit die dood opgewek is. ‘n Bedrogspul? Ek dink nie so nie.

‘n Ander moontlikheid is dat die owerhede die lyk weggeneem het, want gerugte van ‘n opstanding sou hulle polities benadeel.

Daar is ‘n derde moontlikheid en dit is die een wat ek glo – dat Hy leef! Dit lyk beslis nie na die mees logiese verklaring nie. Hoe weet ek dis waar?

Romeine 6:4 Deur die doop is ons immers saam met Hom in sy dood begrawe, sodat, soos Christus deur die wonderbaarlike magsdaad van die Vader uit die dood opgewek is, ons ook so ‘n nuwe lewe kan lei.

Paulus skryf letterlik in die oorspronklike Grieks, ‘sodat ons in die nuutheid van die lewe kan wandel’. Hoe weet ek dat Christus opgewek is? Want ek leef die laaste kwarteeu al in daardie nuutheid van lewe. En al dit is eenvoudig; dis lewensveranderend.

‘n Vars begin. ‘n Nuwe lewe.

Dit is God se Woord. Vars … vir jou … vandag.