Kuyadabukisa ukubona imbali enhle isishwabana ikwi pot plant ,ishwabane qede yome ihhohloke ngenxa nje yokuthi kunomuntu okhohlwe ukuyichelela .Kuphathana kabi kakhulu ngokwedlulele ukubona umuntu ompilo yakhe ibukeka njengaleyombali ehhohlokayo.

Kukhona okumele ngikuvume la .Sekuke kube nezikhathi lakhona nezami izimbali egcekeni zibukeka zoma ,qede ziqale ukuhhohloka  ngenxa yokukhohlweka  ukuzichelela .Zishawe yilanga ,nenhlabathi iqale yome bese ziqale ukufa .

Futhi ngiyazi namuhla kunabantu  abathi lesosithombe sichaza ngqo impilo yami .Kunezikhathi ohambweni lwethu noJesu okuye kubukeke sengathi uthe ukudonsa izinyawo kithi qede sazizwela sihamba sodwa.

Mhlampe makungase kwenzeke nawe uzithole usuhamba kuleyondlela ,nginezwi enginalo ukukucobelela lona namhlanje.

Isethembiso esiqhamuka kuNkulunkulu ,ongathembela kuso ….ngoba sikhona kanye kuleyondawo ufuna mina nawe ,sifunde ukuthemba izwi laKhe .Umethembe Yena .Usululingele ? Nanti :

Isaya  58:11 UJehova uyakukuhola njalo asuthise  umphefumulo wakho ezindaweni ezomileyo ,aqinise amathambo akho,uyakuba njengensimu eniselweyo nanjengomthombo wamanzi,omanzi awo angaphuthi.

Sihlobo sami  ungaliqaphela leligama elithi“njalo” ?  Amanye amatoliko athi “ ngokungamiyo”  -ngamanye amazwi ,ngokunganqamukiyo,ngokungalokothi akuyekelele,ngokungakulahli nakanye . “Ngeke ngikushiye ,ngeke ngikuyekele” kungamagama aliqiniso ngokulinganayo ngamhla uJesu ewasho ngomlomo .

Manje pho uwathola kanjani lawomanzi okuphila ? Uwathola kuphi lawomandla amathambo akho? Sondel’eduze  kuJesu. Yilona kanye iZwi likaNkulunkulu leli … Eliza kuwe li-Fresh namhlanje..